INVENTARIO ILUSTRADO DE FROITAS E VERDURAS

Inventario ilustrado de froitas e verduras
Aladjidi, Virginie
Tchoukriel, Emmanuelle
Tradución: Fernando Moreiras
Un cento de plantas comestibles reunidas nun fermoso catálogo vexetal para pór en valor a biodiversidade, a sostibilidade e a alimentación saudable.

“Inventario ilustrado de froitas e verduras” reúne un cento de deliciosos e nutritivos bocados: plantas comestibles que se poden tomar crúas ou cociñadas. Froitos, talos, bulbos, raíces, sementes, follas, flores… mesmo produtos -como tés, cafés, marmeladas ou chocolates- que se obteñen a partir das materias primas. Tampouco faltan especias, fungos e algas. Hainos comúns como as uvas ou as patacas, exóticos como a carambola, ou con nomes tan rechamante como pan de cabra. Esta obra, baixo a supervisión científica da doutora enxeñeira agrónoma Paule Lacroix, permite distinguir entre o concepto botánico da planta e o termo culinario relativo á súa elaboración para o consumo humano. E sobre todo, contribúe a poñer en valor a biodiversidade, a sostibilidade e a alimentación saudable.

Agrupadas por cores, as froitas e as verduras deste fermoso catálogo amosan representacións moi variadas: asociadas á flor da que proceden, tanto no seu medio natural como xa colleitadas, enteiras en anacos… Mesmo a presenza de insectos como as indispensables abellas, aves, réptiles e pequenos herbívoros axudan a contextualizar esta selección vexetal no seu espazo.